Avannaata Kommuniata kissaatigaa, innuttaasut imermut minguitsumut sukuluisaarnermilu pitsaasumik attaveqarnissaat. Taamaattumik Nukissiorfiit suleqatigalugit innuttaasut imermik pilersorneqarnermut aamma pitsaasunik sukuluisaarnermi attavilersorneqarnissaat pitsanngorsarniarparput. Suliassaqarfiit artornartuupput, inissianut, inuussutissarsiornermut aamma attaveqaqatigiissutinut siunissamut ungasissumut pilersaarusiornermut piumasaqaateqartut innuttaasut peqqissusaannik attuisut. Taamaattumik imermut sukuluisaarnernullu illoqarfinnut nunaqarfinnullu atatillugu pitsaasunik attaveqalernissamik pilersaarusiaq suliariniarparput.
Imermut attavilersorneqarneq
Illoqarfinni sisamani ukioq kaajallallugu imermik pilersorneqarneq nikerarpoq. Naalakkersuisut suleqatigalugit imermik pilersorneqarneq naammattoq, assigiiaartoq, imermillu imigassamik qaffasissumik pitsaassusilik pilersinniarparput.
Nunaqarfinni inissiani ataasiakkaani ukioq kaajallallugu toqqaannartumik imermik pilersuisoqanngilaq. Innuttaasut, ikittunnguit kisimik pinnatik, imertartarfinni imertartarput, taakkunani aasaanerani imermik kuutsitsivimmit slangitigut imeq inissianut ataasiakkaanut ingerlasarpoq (aasaanerani imeq). Naalakkersuisut suleqatigalugit imeq imigassaq naammattoq qaffasissumik pitsaassusilik aamma imermik maqitsisarfiit naammattut pilersinniarpagut, taamaasillutik innuttaasut imermik ajornanngitsumik pissarsiniassammata. Aammattaaq Naalakkersuisut suleqatigalugit immap erngata salittarnissaa misissorniarparput, sumiiffinni imeqarpianngitsuni.
Aammattaaq pingaaruteqarpoq illoqarfinni nunaqarfinnilu tatsit imeqarfiusut mingutsitsinermut illersornissaasa sulissutiginissaat, taamaasilluni avatangiisinik atuineq artorsaatissiissanngimmat.
Sukuluisaarnermi pissutsit
Sukuluisaarnermi pissutsit pitsanngorsarniarlugit, angerlarsimaffimmi aamma suliffeqarfinni, Naalakkersuisut suleqatigalugit Issittumi perusuersartarfimmik ineriartortitsinissamut peqataaniarpugut, sumiiffinni perusuersartarfinnik kuutsittakkanik pilersitsinissaq siunertaanngippat pilersissallugu. Tamanna ingammik nunaqarfinni nunamilu ammasumi pisariaqarluinnarpoq, kisianni aamma tamanna inissiaqarfinni nutaanngitsuni pisariaqarpoq, tassani sukuluisaarnermi kuuffinnut attaveqaatit pilersinneqarsimanngimmata.
Taamaasilluta sulissutiginiarparput, perusuersartarfeqarnermi pissutsit ullutsinnut naleqquttut illunut pioreersunut ikkussuunnissaat sukuluisaarnerup qaffasissuseqarnera siuvarsarniarlugu. Perusuersartarfeqarnermi aaqqiissutit nutaat nassaariniarpagut, soorlu assersuutigalugu perusuersartarfiit ikuallaasinnaasut aamma perusuersartarfiit allat piujuartitsisinnaasut. Aaqqiissutit taama ittut illuni sanaartukkani nutaani aamma nutarterinermik suliniutini siullermik ikkussuunneqassapput, namminerisamillu angerlarsimaffiutilinnut maligassiusinnaallutik.
Sulissutiginiarparput, kommunip suliffeqarfiutaani suliffiit tamarmik sukuluisaarnemi atortunik pitsaasunik peqarnissaat. Kommunimi sulisunut uffarfeqassaaq, perusuersartarfeqassaaq aamma atisanik sulinermi atortakkanik errorsisoqarsinnaassaaq, sulisunut timikkut piumasaqaatitaqartuni. Kloakkit aqqutai imikullu allat pitsaasunngorlugit sulissutiginiarpagut, taamaasillutik pinngortitami eqqaaveqarneq/ perusuersartarfeqarnermi pissutsit illoqarfinni nunaqarfinnilu peqqinnartuuniassammata.
Eqqakkat aqqutaasa allallu erngup errortuutikup eqqagaaneranut atortut pitsaasuunissaat sulissutiginiarpagut, taamaasillutik pinngortitami sukuluisaarnermi pissutsit illoqarfinni nunaqarfinnilu peqqinnartuuniassammata.
Aammattaaq sulissutiginiarpagut, illoqarfinni nunaqarfinnilu eqqiluisaarnikkut aaqqiissutit nutaaliaasut ineriartortinnissaat, taamaasilluni inuiaat peqqissusaat qaffassarniassammat aamma nappaatit, soorlu Corona, AIDS, tuberkulose aamma Hepatisi B akiorniarneqarniassammata. Taamatut isiorniarpugut kikkut tamarmik peqqinnartunik najugaqalersillugit aammalu Peqqinnissaqarfik suleqatigalugu paasisitsiaanermik ingerlatsilluta. Aaqqiissutit taama ittut siullermik kommunip illutaanni ikkussorneqarsinnaapput namminerlu pigisanut inuit najugaannut maligassaalluarsinnaallutik.
Imeqarneq, sukuluisaarneq aamma Ataveqaqatigiissutit
Kommunimi illoqarfinni nunaqarfinnilu tamani imeq errortuutikoq pillugu pilersaarut suliaraaput. Eqqakkat aqqutai piusut, eqqakkat aqqutaasa kuuffii, anartarfilerineq aamma imermut errortuutikumut tunngasut allat nalunaarsorsimavagut, siunissami sukuluisaarnermut atatillugu pilersaarusiornermi atorneqartussaaq.
Naalakkersuisut suleqatigalugit avatangiisit pi-lersaarusiorniarpagut (imeq migutsitamut pilersaarummik taaneqartartut), tamatumani misissorneqassaaq, erngup errortuutikup immat, kuuit aamma tatsit qanoq sunnertarnerai, taamaasilluni taakku immap avatangiisaanik sunniinerat minnerpaaffianiitsinniarlugu.
Aqqusernit misissorniarpagut, taamaasilluni nunaqarfinni nunami angallannermut attaveqaateqalerniassammata, attaveqaatit imermik maqitsisarfimmi imertarnermi aamma eqqakkanik assartuinermi naleqquttut.
Naalakkersuisut suleqatigalugit Ilulissani, Upernavimmi Uummannami aamma najugarfinni allani tamani imermik pilersuineq naammattoq aaqqiissuteqarfiniarparput, taamaasilluni illoqarfiup ineriartortinnissaanut periarfissaqalersillugu.
Kommunip pilersaarutaani makku suliaqarfiussapput:
- Imermik pilersuinissamut (imertartarfiit) aqquteqarnissaq qulakkeerniarlugu illoqarfinni nunaqarfinnilu angallannermut pilersaarusiorneq
- Eqqakkatigut atukkat siuarsarneqassammata illoqarfinni, nunaqarfinni nunamilu eqqakkanut, avatangiisinut imikumullu pilersaarusiorneq
- Eqqakkatigut atukkat pitsaasuunissaat peqqinnartuunissaalu eqqarsaatigalugit aalajangersagaliorneq
Immikkoortunik suliaqarnermi makku sammineqassapput:
- Eqqakkanut, avatangiisinut imermullu errortuikumut pilersaarutit
- Angallannermut pilersaarutit
- Nuna tamakkerlugu immikkoortunut pilersaarusiornermi kommuni pilersaarutini tamani siunnersuuteqassaaq ilaatigut imermik pilersuinermut eqqakkanullu tunngasumut sunniuteqarsinnaaneq eqqarsaatigalugu