Ilulissanut ileqqoreqqusaq ilisimatitsissutaasoq

Avannaata Kommuniani ukiuunerani Ilulissat eqqaanni assartuutit motoorinik ingerlatillit nunaannarmi atorneqarneri pillugit ileqqoreqqusaq

Assartuutit motoorinik ingerlatillit atorneqarneri pillugit Namminersorlutik Oqartussat nalunaarutaat nr. 10, 10. oktober 2013-imeersumi § 6, aamma § 7 imm. 1, § 9, imm. 1 aamma § 12 naapertorlugit aalajangersarneqarpoq.

Ilulissanut ileqqoreqqusaq ilisimatitsissutaasoq (PDF)

Atuarnissaanut ilitsersuut

Ileqqoreqqusat aalajangersakkallu tamarmik ilaatigut pdf-filini ilaatigullu nunap assingini takuneqarsinnaapput.

Ileqqoreqqusani nunap assingi Kalaallit Nunaanni nunaannartamut tunngaviusutut nunap assinginik aallaaveqarlutik suliaapput. Kalaallit Nunaanni nunaannartamut suli nutarsakkanik nunap asseqanngilaq. Taamaattumik Pilersaarutinut nittartakkami aamma ileqqoreqqusani nunap assingisa akornanni assigiinngissuteqarsinnaavoq.

Pilersaarutinut nittartakkami nunap assingisa kommunimut tamarmut ataatsimut isiginniffissaq pilersuutigaat. Kisianni: Sumiiffinni ileqqoreqqusani nunap assinginut ilanngussat (pdf-filini), aamma Pilersaarutinut nittartakkami nunap assingisa (dynamic maps) akornanni  assigiinngissuteqartoqassappat ileqqoreqqusat (pdf-filini) nunap assingi atuutissapput.

Ilulissat eqqaat: Kangiani assartuutit motoorillit atorlugit angalasoqaqqusaanngilaq. Tassani ileqqoreqqusami nunap assinga atuuttuuvoq.

Atuuffissai il.il.

§ 1. Avannaata Kommuniani Ilulissat eqqaani assartuutit motoorinik ingerlatillit nunaannarmi atorneqarneri pillugit ileqqoreqqusaq una atorlugu aqqutissat aamma ingerlaarfissat killeqarfiisa toqqarneqarnerinut malittarisassat aalajangersarneqarput.

Imm. 2. Ilulissat eqqaanniipput Ilulissat nunaqarfiilu Ilimanaq aamma Oqaatsut. Nunaannarmi killeqarfiit ilanngussaq 1-imiipput.

Imm. 3. Ileqqoreqqusami matumani nunaannarmi nunaminertat pineqartut tassaapput kommunimut pilersaarummi illoqarfiup nunaqarfiillu avataaniittut.

Imm. 4. Imartat, kangerluit, kuuttut tatsillu sikusarnerisa nalaani nunaannarmut ilaatinneqarput.

Imm. 5. Ileqqoreqqusaq Sermersuarmut iigartartunullu Sermersuarmeersunut atuutinngilaq.

§ 2. Motoorinik ingerlatillit ileqqoreqqusami pineqartut tassaapput angallatit motoorillit suulluunniit sikukkut, aputikkut, qaqqakkut nunaannakkullu ingerlasinnaasut, matumani ATV-t, illiniliuutit qamuteralaallu ilanngullugit.

§ 3. Atuisussaatitaanermik nalunaaruteqartariaqartumik aqqusinerni, unittarfinni narsaatinilu il. il. angallanneq, pilersaarusiornermut inatsit naapertorlugu, ileqqoreqqusami matumani atuutinngillat.

Imm. 2. Nakkutilliinermut oqartussaasut avatangiisinik pinngortitamillu nakkutilliinerannut, annaassiniarnerannut, politiit misissuinerannut, illersornissaqarfiup suliaqarnerannut assigisaannullu tunngasut ileqqoreqqusami matumani atuutinngillat.

Imm. 3. Sumiiffinni, angallatit motoorinik ingerlatillit atorlugit angallannermut inatsisit allat aqqutigalugit maleruagassiuiffiusuni, maleruagassiat sukkulluunniit killilersuiffiunerusut atuutissapput.

Nunaannarmi motoorinik ingerlatilinnik atuineq

§ 4. Nunaannarmi angallatinik motoorilinnik angalaneq taamaallaat kommunalbestyrelsip akuerisaatut ukiuunerani angallavissatut akuerisaani aamma ukiuunerani angallannermut aqqutissiani akuerisaapput, takukkit ilanngussat 1-6.

Imm. 2. Angallannermut aqqutissiani nalunaarsukkani aamma angallavissatigut angallatinik motoorilinnik angalaneq taamaallaat ukiuunerani 1. oktobari-31. maajimi pisinnaavoq.

Imm. 3. Angallatit motoorillit nunakkoortillutik ajutoorsimassappata, naggorissutsimut nunamullu uuliakooratarsinnaaneq imaluunniit orsussamik aniasooratarsinnaaneq pitinnagit peerneqassapput. Angallatit motoorillit Kommunalbestyrelsimit peeqquneqareernerisa kingorna peerneqanngippata, piginnittup akiligaanik Kommunalbestyrelsimit peersinneqarsinnaapput.

 

Angallannermut ataatsimoortumik aalajangersakkat

§ 5. Ukiuunerani assartuinermut aqqutissatut ukiuuneranilu angallavissatut toqqarneqartuni nunap qerinerani, apummik qallerneqarnerani aammalu naasunut nunamullu ajoqusiiviusinaanngitsumik angallavissaalernerani angalanissaq inerteqqutaanngilaq.

Imm. 2. Angallatinik motoorimik ingerlatilinnik imeqarfiup killeqarfiata iluani angallanneq inerteqqutaavoq, taamaattoq imm. 3 naapertorlugu.

Imm. 3. Ilulissat eqqaani imeqarfiup killeqarfiata iluani motoorinik angalaatilinnik angallassinnaaneq, Naalakkersuisut ukiut tallimat atuussinnaasutut immikkut akuersissutigaat. Immikkut akuersissutigineqartoq 01.01.2025 tikillugu atuutissaaq.

Imm. 4. Imm. 1-imi aalajangersakkat imaani sikukkut, kangerlukkut, kuukkut tatsikkullu angallanneq atuutinngilaq.

§ 6. Nunaannarmi angalanermi naasunut aseruutaasinnaasumik sangupiloorfigineqasanngilaq, aallarsarfigineqassanngilaq unipiloorfigineqassananiluunniit.

Imm. 2. Kuuit sinaat uingarnillu kiisalu tatsit killingi, kuuit annerit kiisalu kangerluit ikaarneqartassapput, naasut nunallu ajoquserneqarfissarinngisaasigut.

Imm. 3. Angallanneq naasut uumasullu sianigalugit pissaaq. Nunami immamilu uumasut miluumasut illersornissaannut piniagarinissaannullu qaqugumulluunniit atuuttutut nalunaarutit malittarineqassapput.

Imm. 4. Qimussinut ungasissusissat sapinngisamik minnerpaamik 10 meterinik ungasissuseqassooq.

Imm. 5. Angallannermi aqqutit nunap assingatigut sapinngisamillu aqqutitigut nalunaaqutsersuinikkut kommunimit isumagineqassapput.

 

Immikkut ittumik akuersissutit

§ 7. Pisuni immikkut ittuni ilanngussaq 1-6-p avataani assartuutit motoorinik ingerlatillit atorlugit aqqutissatut akuerisani angalanissamut kommunalbestyrelse immikkut ittumik akuersissuteqarsinnaavoq.

Imm. 2. Immikkut ittumik akuersissuteqartoqarnissaanut qinnuteqaat tunngavilersugaq angalanissaq pilersaarutaasoq kingusinnerpaamik sapaatit-akunnerinik sisamanik sioqqullugu kommunalbestyrelsimit tiguneqarsimassaaq aamma nunaminertanik imaluunniit aqqutigisassanik takutitsiviussalluni.

Imm. 3. Kommunalbestyrelse immikkut ittumik akuersissuteqarnermut atatillugu naapertuuttutut isigineqarsinnaasunik piumasaqaateqarsinnaavoq.

Imm. 4. Immikkut ittumik akuersissutit Avatangiisinut Naalakkersuisumut ilisimatitsissutigineqassapput.

Imm. 5. Imm. 1 aamma imm. 2 naapertorlugit akuersissutit sukkulluunniit kommunalbestyrelsimit imaluunniit Naalakkersuisunit allanngortinneqarsinnaapput utertinneqarsinnaallutilluunniit, immikkut ittumik akuersissuteqarnissamut piumasaqaatit unioqqutinneqarpata, imaluunniit kommunalbestyrelsip Naalakkersuisulluunniit naliliinerat malillugu pissutsit pinngortitamut avatangiisinullu ajoqusiisinnaasut pineqarpata.

Imm. 6. Immikkut ittumik akuersissutit ukioq ataaseq tikillugu tunniunneqartarsinnaapput.

 

Nakkutilliineq il.il.

§ 8. Kommunalbestyrelsip nalunaarummi uani malittarisassat malinneqarnersut nakkutigissavaat.

Imm. 2. § 5-imi, imm. 1 aamma 2 angalanermut maleruaqqusat piffissap ilaani naammassineqarsimanngippata kommunalbestyrelse inerteqquteqarsinnaavoq peqqussuteqarsinnaallunilu.

Imm. 3. Peqqussutit tassaasinnaapput angallaviit aalajangersimasut atorneqarnissaannik piumasaqaatit.

Imm. 4. Inerteqqutit tassaasinnaapput sumiiffinni aalajangersimasuni piffissami aalajangersimasumi angallannerup tamarmi unitsinneqarnissaanik piumasaqaatit.

§ 9. Nalunaarut manna naapertorlugu aalajangikkat tamarmik Avatangiisit innarlitsaaliorneqarnissaat pillugu Inatsisartut peqqussutaanni nr. 9-mi, 22. november 2011-meersumi kapitali 14-imi malittarisassat naapertorlugit naammagittaalliutigineqarsinnaapput.

 

Pineqaatissiinermut aalajangersakkat

§ 10. § 4-mik, § 5-imik aamma § 6-imik unioqqutitsineq akiliisitsinermik aamma/imaluunniit arsaarinninnermik kinguneqarsinnaapput.

Imm. 2. Piumasaqaatinik, § 7, imm. 3 naapertorlugu aalajangersarneqartunik unioqqutitsineq akiliisitsinermik kinguneqarsinnaavoq.

Imm. 3. § 8, imm. 2-4 naapertorlugit peqqussummik imaluunniit inerteqqummik unioqqutitsineq akiliisitsinermik kinguneqarsinnaavoq.

Imm. 4. Ileqqoreqqusatigut akiliisitsinermik kinguneqartitsinermi, Kalaallit Nunaanni pinerluttulerinermi inatsimmi malittarisassat malillugit inatsisitigut pisinnaatitaasumut akisussaatinneqarsinnaapput.

Imm. 5. Imm. 1-4 naapertorlugit akiliisitsissutit Nunatta Karsianut nakkartinneqartassapput.

 

Atuutilerfissaq

§ 11. Ileqqoreqqusaq una atuutilissaaq, ulloq 24.02.2021.

Avannaata Kommuniani Kommunalbestyrelsi, ulloq 19.02.2021

_________________
Palle Jerimiassen
Borgmesteri