Nunarsuarmi kissakkiartornerup nunarsuarmi tamarmi, minnerunngitsumillu Kalaallit Nunaanni silap pissusaatigut allannguutit nassatarai tamaanilu allanngoriartornerit erseqqinnerpaamik takuneqarsinnaallutillu malugineqarsinnaapput. Kiassuseq aamma apisarneqsiallertarnerlu annertuseriassapput, imartamilu sikup siammaqqanera annikillissaaq, ilaatigut tamakku pinngortitatsinnutaamma uumasunut, attaveqaasersuutinut inuussutissarsiornermullu sunniuteqassallutik. Silap pissusaata sunniuteqarnera annikillisinniarlugu iliuuseqarfigisariaqarparput, taamaattorli siullertut pingaarnertullu erngup annertussusaa qaffakkiartortoq sillimaffiginiarlugu piginnaasat annertusarniartariaqarpagut, aammalu avatangiisuni sanaartorfiusuni ajoqusernerit pinaveersaartinnissaanut allaanerusumik pilersaarusiortariaqarluta.
Aarleqqutaasinnaasunik nalunaarsuinerit
Silap pissusaata allanngoriartorneranut attumassutilinnik arlalinnik aarleqqutissaqarpoq. Ilaatigut sermersuup sermillu ukkartarfiisa akkiartornerisa nassatarisaannik ukiuni aggersuni nunarsuarmi imaq qaffakkiartussasoq nalilernerqarpoq. Immap qaffakkiartornera malillugu qarsutsisoqartarnissamut aarlerinartorsiorneq aamma annertusiartorpoq. Taamaattumik sanaartugassat nutaat inissiffissaasa peqqissaarullugit isumaliutigisarnissaat siunissami sanaartornissamut suliunitinik illuliornermullu pilersaarusiornermi pingaartuuvoq.
Aamma sanaartukkanut sinerissamut qanittunut atatillugu aarleqqutaasinnaasunik nalilersuisassaagut, qarsutsisoqartarnissamut neriuisinnaanernullu aarleqqutaasunik nalunaarsuisassaagut, aammalu pinngortitami ajunaarnersuaqartoqartillugu upalungaarsimanissamut pilersaarusiussalluta
Iluarsiissutit akiuussinnaassusillit
Kissakkiartortoqartoq ilisimatusarnerup takutippaa, tamatumalu aamma nassataraa ullut qerilerfiusartumut qanittumik kissassueseqarlutik amerlassusaasa qularnanngitsumik amerlinissaat. Tamanna ajornakussoortitisinnaavoq, kissassutsit qerilerfiusartup nalaaniittut allangorarnerini aqquserngit pisuinnaallu aqqutaasa quatserneri nassatarisinnaammatigit. Taamaattumik quasattumi angallannerup isumannaatsuunissaanut pitsaanerusumut iluarsiissutit nassaarissavagut.
Qerilerffiusartup nalaani kissassuseqarlutik ullut qimussernermut taamatut aamma unammilligassaqartitisivoq, apummi serminngortoq qalippersuulluni pinngorsinnaammat, tamannalu qimmit aluinut ajoqutaavoq. Aamma imartami sikumi qimusserneq unammilligassaqarfiuvoq, ukiummi ingerlanerini imartami sikup siammarsimassusia annikilliartorpoq, aammalu ingerlavigissallugu ulorianarsiartorluni. Taamaattumik nutaaliortumik isumaliortariaqarpugut, aammalu Avannaani qimussertarnikkut ileqquusup nukittuup attanniarnissaanut iluarsiissutit nutaat nassaarissallutigit.
Ukiuni kingulliunerusuni tamakkunani apilluniaamma siallerfinni ullut malunnartumik amerleriarput, allanngoriartornerlu tamanna ilimanarluinnartumik pinngitsoorani nangittussaavoq. Sakkortuumik ingasattumillu siallertarneq eqqakkat aqqutaannik, aqqusinernik kussinernillu artukkiissaaq, taamaattumillu aaqqissuussiffiit pitsaanerpaanngorsarniarlugit suliaqartariaqarpugut, taamaalilluta erngit annertussusaat suliaqarfigalugit isumagisinnaassagatsigit.
Aamma silap pissusaanut allanngortumut illuliarisagut akiuussinnaassuseqarnissaat qularnaartariaqarpagut, tassalu atortussanik inissiinernullu toqqaanernut tunngasutigut. Aqqusinitta illuutittalu ilarujussui nunami qeriuaannartumi toqqaviligaapput, tamanna toqqavittut manngerlunilu atajuartutut immat. Nunali qeriuaannartoq nunarsuarmi kissakkiartornerup nassatarisaanik naatsorsuutigineqartumut naleqqiullugu sukkanerujussuarmik aakkiartortoq misissuinerit takutippaat. Illunut aqqusinernullu, sanaartugaaffimmikkut ajoqusertussanut toqqaviusunut tamanna kinguneqartitsissaaq. Taamaattumik iluarsiissutit akiuussinnaassusillit toqqassavagut, aammalu periarfissaatillugu qaarsortami aalaakkaasumisanaartortassalluta.
Periarfissanik nutaanik suussusersineq iluaquteqarnerlu
Silap pissusaa kissarnerulersoq kommunimut ajoqutaasunik kinguneqartitsiinnassanngilaq, aammali periarfissanik nutaanik nassataqassaaq. Assersuutigalugit sivisunerusumik sikuunnginnera pilersuinermut assartuinermullu periarfissanik nutaanik pilersitsissooq, taakkulu inuussutissarsiornermik kommunillu ataqatigiissinnaassusaanik ineriartortitseqataasinnaapput.
Aamma sanaartornermik pisoqarfiusup sivitsornera silap pissusaata kissarnerulersup nassatarissavaa. Taamaattumik pissutsit tamakku nutaat malillugit ukiumut pilersaarusiortarnerput iluarsartuartarniarparput. Piukkunnaataasut taamaalilluta atugassarisat iluaqutigisinnaassagatsigit.
Ilulissat Kangia Nunarsuarmi kingornussassaqarfiusoq tassaalersimavoq silap pissusaata allanngornerata sunniutaanut ilisarnaat, Sermip Kujalliup erseqqissumik tunuariartornera pissutaalluni. Silap pissusaata allanngoriartornera pillugu ilisimatusarnermut paasisitsiniaanermullu kommunerput soqutiginaateqalersippaa. Silap pissusaata allangoriartornera pillugu ilisimatusarnermi suliniutit ilisimasanillu agguaasseqatigiinneq tapersersortuassavarput, ilaatigut Kangiata Illorsua takkuttussaq aqqutigalugu.
Kommunip pilersaarutaani makku suliaqarfiussapput:
- Immap ulerujussuartarnera nunallu qeriuaannartuunera isumatusaarfigalugit nutaanik nunaminertalersuineq
- Nunap qeriuaannartuunera isumatusaarfigalugu illunut toqqavinnik aqqusinernillu sanaartornissaq
- Silaannaap allanngoriartorneranut akiuussinnaasunik atortunik sanaartoriaatsinillu peqarnissaq
- Silaannaap allanngoriartornera eqqarsaatigalugu qimussit illerngisa pilersaarusiornissaat
- Nunap qaavani erngup kuutsinnissaanut kusserngit allatut pilersaarusiornissaat
Immikkoortumi suliaqarnermi makku sammineqassapput:
- Pinngortitami ajunaarnersuarnut upalungaarsimanissamut pilersaarutit
- Silap pissusianut attuumassutilittut ineriartortitsinissamut periarfissat nutaat suussusersineri tapersersornerilu