Kalaallit Nunaat tamakerlugu avatangiisit aamma eqqakkat pillugit annertuumik unammilligassaqarpoq. Eqqakkat pilersutat amerliartorput, inuit atuinerisa annertusiartornerat pissutaalluni, aammali sanaartornerup annertusiartornera pissutigalugu. Maannakkut eqqagassat tulluartumik isumagineqarneq ajorput, tamannalu avatangiisitsinnut, pinngortitamut, uumasunut innuttaasullu peqqissusaannut pitsanngitsumik kinguneqarpoq. Kommunitut suliassarput tassaavoq eqqagassat imatut suliarissallutigit avatangiisinut ajoqusiitinnagit. Taamaattumik eqqakkanik suliaqartarnitsinnut piffissamut ungasissumut piujuartitsisunillu iliuusissanik nassaarniarluta annertuumik iliuuseqartariaqarpugut.
Illoqarfinni annertunermik atoqqiisarneq
Ukiuni kingulliunerusuni atortussanik atoqqinneqarsinnaasunik immikkoortiterisarnermut aamma poortuisarnermut iluarsiissutinik assigiinngitsunik misileraallutalu umiarsuartigut nassiussaqartarnermut pikkorinneruleraluarluta kommunimi eqqagassaatit tamarmiusut taamaallaat 2 %-iisa missaat ullumikkut atoqqitassanngorlugit umiarsuartigut nassiunneqartarput. Eqqagassaatitta annertunerpaartaat suli ikuallaanikkut inississuinikkullu piiagaasarput.
Sallersaalluta ingerlarusuppugut, aammalu eqqagassanik isiginninnerput allanngussavarput, annertunerusumik isumalluutaasutut isigineqalersillugit. Suli eqqagassaatitta ilaat ikuallattariaqassavagut, illoqarfinnili suliaqarneq piujuartitsinerusoq sulissutiginiarparput, tassani atoqqiineq atueqqinnerlu sammissallutigit, eqqagassallu tamakkiisumik piukkunnaataanik atuissalluta.
Illoqarfinni tamani immikkoortiterinermik aaqqissuussivik ineriartortinniarparput, taamaalilluni eqqagas- saatitsinni annertunerusoq iluaqutigineqarlunilu atoqqinneqassammat. Plastikki, igalaamineq, sisak/savimineq, aamma pappi/pappiala immikkoortittalissavagut, aammalu eqqagassat navianartut immikkoortinnerunissaat sammissallutigit. Aammattaaq Ilulissani qitiusumik eqqagassanut isumalluutissanullu ingerlatsivimmik ineriartortitsinissamut periarfissamik misissuiniarpugut, atoqqiinermut atueqqinnermullu iluarsiissutit nutaat nassaarissallutigit, aammalu innuttaasut eqqagassaatiminnik atoqqinneqarsinnaasunik tunniussaqartarnissaat oqilisassallutigu.
Aamma kommunip sullissisarfiinut minguitsumik pisiortornermut maleruagassiamik suliaqassaagut, taamaalillutik pisortat pisiortugaat avatangiisit isumalluutillu isumaliutigalugit annertunerusumik ingerlanneqartalissammata
Nunaqarfinnut iliuusissatut pilersaarutit
Ungasissutsit annertuut, najugaqarfiusut amerlasuut, aamma killeqartumik umiarsualivinni atortorissaarutit tunngavigalugit kommunimi immikkut ittunik attaveqaasersuutitigut tamaviaarfissaqarpugut, tamakkulu nunaqarfinni eqqagassanik suliaqarnermut annertuunik unamilligassaqartitsipput.
Nunaqarfinni ikuallaaviit nungullaqqapput, imaluunniit atorneqarsinnaanngillat, ullumikkullu t eqqagassat pilersinneqartut suliarinissaannut piginnaasaqanngilagut. Tamakku saniatigut ikuallaanerit silaannarmik migutitsinermik qaffasissumik aniatitsipput. Taamaammat atortunik nutaanik, avatagiisit pillugit pitsaasutsinik piumasaqaatinik ullumikkumut naleqquttunik naammassisuusunik pissarsinissarput salliutissuarput.
Nunaqarfinni eqqakkanik avatangiisinut naleqquttumik suliaqarnissamut najugaqarfiusuni iliuusissatut sammisaqartumik, najgugaqarfinni iluarsiissutissat nassaarinissaannik pilersaarusiussaagut. Sumiiffimmi suliaqartuusut suliffeqarfiillu peqataatinnissaat pingaarluinnarpoq, taamaalillutik eqqaanermi piujuartitsisumik tigussaasunillu iluarsiissutissanik nassaarniarnermi peqataasinnaassammata. Anartarfilerineq immikkut sammisariaqarpoq, aamma aasaaneranut ukiuuneranullu naleqqussarneqarsinnaasunik iluarsiissutinik nassaartoqartariaqarluni, ukiup qanoq ilineri assigiinngitsunik unammilligassaqartitsimmata, taamaalillutillu igitassanik eqqagaanermut assigiinngitsunik periarfissiisarlutik.
Aamma eqqaavissuarnut ikuallaasarfinnullu aqqusinerni pissutsit nutarsarnissaat pisariaqarpoq, aammalu ingerlatsiviit nutaat inissiaqarfiusunut qanittuutinnagit inissinnissaat qularnaarneqassaq.
Qaammarsaaneq aamma paasissutissiineq
Eqqagassat kommunip kisimiilluni suliassarinngilai, taamaattumillu najugaqarfigisatta minguitsuutinissaanut pinngortitallu illersornissaanut ilaaqqullugit innuttaasut inuussutissarsiortullu kaammattortariaqarpagut. Kommunimi eqqagassat ilarujussui inuussutissarsiornermit, siuariartortuusumit pipput. Suliffeqarfiit eqqagassanik suliaqartarneranut annertunerusunik piumasaqaateqarniarpugut, aammalu peqatigiilluta piujuartitsisunik iluar- siissutinik nassaarniarluta inuussutissarsiortunik suleqateqarneq nukittorsarniarparput.
Ullumikkut pinngortitami maagaannaq eqqaaneq unamillernartuuvoq, tamannalumi nunami imartamilu uumasunut eqquivoq. Tamatumunnga ilanngullugu eqqagassanik tigooraasarfiit innuttaasunit naammattumik atorneqanngillat, nassataralugu eqqagassat navianartut naammattumik immikkoortiterneqarneq ajornerat.
Taamaattumik eqqagassanik suliaqartarneq aamma avatangiisit pillugit innuttaasut paasissutissiiffigalugillu qaammarsaaviginissaannut annertuumik iliuuseqarniarpugut, aammalu atuisartunik atoruminarsaaneq annertusarniarparput, taamaalilluni eqqortumik immikkoortiterinissaq oqinnerulissammat, avatangiisinullu tulluartumik ileqqoqalerneq anguneqarluni.
Kommunip pilersaarutaani makku suliaqarfiussapput:
- Illoqarfinni nunaqarfinnilu avatangiisinut mingutsitsinngitsumik eqqakkanik passussineq.
- Ilulissani eqqaavissuarmut nutaamik nunamin ertamik inissiinissamut misissuineq
- Ilulissani qitiusumik eqqagassaleriviliornissaq.
- Immikkoortuni nutaani eqqakkanik aaqqiissusiorneq uninngatitsivinnullu nunaminertaqartitsineq
- Avatangiisit pingaartillugit inoqarfinnik ineriartortitsineq
Immikkoortunik suliaqarnermi makku sammineqassapput:
- Avatangiisimut sunniutit pillugit paasissutissiineq
- Kommunimi niuverfiusartut pillugit politikkeqarneq avatangiisitsinnut peqqinnarnerusoq
- Inuussutissarsiortunit oqaloqateqarneq