Aalaakkaasunik isertitaqarluni inuunerup toqqissisimanartup pilersissinnaanissaanut ilinniagaqarsimaneq suliffeqarnerlu tassaapput tunngaviliissutit ilaat. Innuttagut suliffissaqalernissamut pitsaasunik tunngavissaqarnissaat kommunitut qularnaaqataaffigissavarput. Kommunimi suliffissat amerlasoorpassuit pisortaqarfinniipput. Pisortaqarfinni ingerlatat sulisunit piginnaanilinnit isumagineqarnissaat qularnaassavarput, taamaalilluta suliassagut akisussaaffeqarfigalugit pitsaasumik naammassisinnaassagatsigit.
Sulisugut piginnaanngorsassavagut, aammalu innuttaasut amerlanerit suliffissaqalernissaat sulissutigissallutigu.
Inuttassarsiornermut attassinissamullu periusissiaq
Avannaata Kommunia tassaavoq Avannaani pisortatut suliffeqarfinni annerpaaq, pisortallu kiffartuussiffiatut ingerlatsiviit, soorlu ulluunerani neqoroorutit, atuarfiit, paaqqinniffittullu najugaqatigiiffiitingerlataraagut. Atorfiit tamakku sulisunit piginnaasalinnit inuttalernissaat pingaartuuvoq.
Ilulissani ukiuni arlalinngortuni aatsaat ilinniartitsisutut perorsaasutullu atorfiit tamaasa sulisunik ilinniarsimasunik inuttassarsivagut. Taamatut allanngoriartorneq kommunimi sulisunik inuttalersuinissamik ajornakusoorfiusuni suli annertunermik ingerlaqqissaaq. Ilulissani Perorsaanermik Ilinniarfik eqqaassanngikkaanni kommunimi inuusuttunut ilinniagaqarfissanik, imaluunniit nangitsilluni ilinniarfissanik peqannginnerput unammillernarpoq, aammalu inuusuttut ilinniariartorlutik aallartartut naammassereernermik kingornatigut uteqqittannginnerat annertusiartortoq takuneqarsinnaavoq.
Taamaattumik kommunimi tamarmi sulisunik piginnaanilinnik qanoq inuttassarsiorlutalu attassisinnaanitsinnut periusissialiorniarpugut. Kommunitta sumiiffittut najugaqarfigalugulu suliffiginissaata kajumernartuunissaa sulissutiginiarparput. Tamatuma ilaatigut nassatarissavaa sulisunut inissiat amerlanerit pitsaanerusullu, sulisunut ilinniartitaqarnermik aallartitsinermillu ingerlatat pitsaasut, kiisalu pikkorissartitsinerit piginnaanngorsarnerillu pillugit neqeroorutit.
Sivisuumi suliffissaaleqisut sioqqutsisumillu soraarnerussutisiallit ikinnerit
Siusinaartumik pensionisiallit amerliartorput. Ilaatigut kommunimi innuttaasut amerlasuut timikkut artorsarfiusumik suliffeqarnerannik,taamaattumillu siusissukkut nukeeruttarneri ilaatigut tamatumunnga pissutaavoq. Suliffissaaleqinermut patsisaasut allat tassaapput inooqatigiinnikkut tarnikkullu ajornartorsiutit, atornerluinikkut unammisassaqarnerit, innarluuteqarneq, kiisalu sivisunerusumik nappaateqarnissamut nikikkiartuaarnerup annertusiartornera.
Ineriartorneq taanna illua’tungaanut saatinniarparput, siusinaartumillu pensionisiallit amerlassusaat 30 %-inik ikilisinniarlutigit. Ilaatigut piginnaanngorsaaqqinnernik neqerooruteqartarnerup iluani kommunitta sullissisarfinni siuttuunissaa tamatuma nassatarissavaa. Sivisuumik suliffissaaleqisunut siusinnartumillu pensionisiaqalernissamik qinnuteqartunut sulinermik sungiusarfissamik neqerooruteqartarnissaq pillugu suliffinnik namminersortunik soorlulusooq pisortat suliffiutaannik pitsaasumik suleqatigiinnissamik pilersitsinissatsinnik tamanna piumasaqarfiuvoq, assersuutigalugu innuttaasut eqqortiasut aamma peqataasinnaalersillugit piffissap ilaani suliffiit immikkut sianigisaqarfigisat annikitsisut atorlugit.Tamatuma saniatigut kommunimi ilitsersuisarnermik kaammattuussisarnermillu ingerlatat sunniuteqarnerussapput, taamaalillutik amerlanerit suliffissaqalissammata. Taamaattumik sivisunerusumik ingerlataq misilissavarput, taamaalilluni suliffissaaleqisut isumalluutigisaannik nassaarniarnermut, sulisinnaassusaannillu ineriartortitsinissamut annertunerusumik piffissaqassammat. Tamatumunnga nangitsilluta maligassiuisoqarnermik pilersitsisinnaanerit misissussavagut, taamaalillutik sivisuumik suliffissaaleqisut, aamma siusinaartumik pensionisiaqalernissamut qinnuteqartut tulluartumik tapersersugaallutillu ilitsersorneqarsinnaassammata, nutaamik suliffittaarnissapimaluunniit siusinaartumik pensionisiaqalernissamik qinnuteqaamut atatillugu misissuinerit naammasinissaata tungaannut.
Saaffiginnittumik inuusuttunut iliuuserisat
Kommunimi inuusuttut amerlavallaat ilinniagaqaratilluunniit suliffeqanngillat, taamaattorli suliffissaaleqisutut nalunaarsugaasimanatik.Aaqqissuussiffiup avataaniikkaangata anguniagassatut iliuuserisassiorneq i ajornakusoorsinnaavoq. Taamaattumik kommunimi inuusuttut suliffeqanngikkaangata suut tunngaviusarneri nalunaarsorlugillu paasiniarniarpagut. Annertunerusumik ilisimasaqalernikkut iliuuserisagut toraagassalersinnaavagut, aammalu pinaveersaartitsinermik suliaqarsinnaalluta, aammalu ilinniagaqarnermik imaluunniit suliffissaqarnermik aallartitaqarnissaannik ikiorsersinnaallutigit, taamaalillutik inersimasutut inuunissaminnut aallartilluarsinnaassammata.
Inuusuttunut suliffissat amerlanerit pilersinnissaat, aammalu Majoriami atuagarsornertaqanngitsumik ingerlatani amerlanerit peqataanissaat sulissutiginiarparput. Ilinniagaqalerlutik ingerlariaqqinnissaannik tamakku najoqqutarisassanik tunngavilissavaat. Ornigulluni suliaqarneq, kommunimi suliffinnik ilinniagaqarfissanillu nittarsaassinerit, kiisalu qaammarsaasarnerit periarfissanut aqqummik inuusuttunut takutitseqataasinnaapput.
Kommunip pilersaarutaani makku suliaqarfiussapput:
- Ilinniarfeqarfiit ungasinngisaanni inuusuttunut ilinniartullu kollegiassaannik sanaartornissamut nunaminertassaqartitsineq
- Inissiaqarfinnut nutaamut ilanngullugit sulisut pilerinartunik inissiaqartinneqarneri
Immikkoortunik suliaqarnermi makkusammineqassapput:
- Inuusuttut akornanni suliffissaaleqinermut patsisaasunik nalunaarsuinerit, aamma saaffiginnittutut iliuuserisat naammassinissaat
- Piginnaanngorsaaqqinnermik suliffissat aamma piffissap ilaani suliffiit pillugit suliffeqarfinnik namminersortunik suleqateqarnerit
- Kommunip suliaqarfianut inuttassarsiornermut attassiniartarnermullu periusissialiorneq
- Sivisuumi suliffissaaleqisunut ilitsersuinermik kaammattuisarnermillu ingerlatamut toraagaqartumik iliuuserisat
- Sioqqutsisumik soraarnerussutisinissamut qinnuteqaatinut paatsisaasunik misissueqqissaarineq aamma nalunaarsuineq