Toqqissisimaneq aamma inuuneq pitsaasoq

Ilinniarnermi inerisaanermilu toqqissisimaneq tunngaviulluinnartarpoq. Qaasuitsup Kommuniata inuuniarnermikkut ilungersunarsiortut immikkut sammivai kommunemilu meeqqat tamarmik toqqissisimanartumik meeraanissaat anguniarlugu killissanik toqqissisimanertunik pilersitsinissani suliniuteqarfigaa aamma illoqarfiup iluani ataatsimoorfissat pitsaasut toqqissisimanartullu pigineqarput.

Qaasuitsup Kommuniani innuttaasut tamarmik toqqissisimasumik inuuneqarnissaat kissaatigaarput.

Taamaattorli ineriartorniaraanni inerikkiartorniaraannilu toqqaammavik pitsaasuusariaqarpoq. Inuit tamarmik inuuniarnermikkut pitsaasunik atugaqarnissartik pisariaqartippaat namminneq inuuniassagunik inerikkiartorlutillu.

Siuligut issittumi pinngortitamut tulluussallaqqissuupput. Silap allanngorarnera siumullu oqaatigineqarsinnaanngitsut unammilligassat nalaattaraluarlugit peqqissaarussillutik ilumoorussillutillu piareersartarput ajornartorsiutaasinnaasunillu aniguisarlutik.

Nukiusinnaasut tamaasa allanngoriartornermilu piareersimasarnerit kulturitsinniittut pinngoqqaarnitsinniillu inuuniarnitsinni piginnaasagut tamaasa ullutsinni unammilligassarpassuit anigorniarneranni atorfissaqartippagut.

Nukissagut aallaavigissavagut ajornartorsiutaasinnaasut aallaaviginagit. Inuk qitiutillugu periarfissat nukiillu immikkut sammissavagut, taamaaliornitsigummi pitsaasumik inerisaaneq allannguinerlu pilersissinnaavagut.

Inuit ataasiakkaat inooriaasii ataqqiutigalugit inunnut ataasiakkaanut arlaannik piumasaqassaavugut piumasaqaateqassallutalu.

Meeqqat inuusuttullu immikkut pingaartissavagut – taakkuuppummi siunissami inuiaqatigiinni siuttuulersussat. Meeqqat immikkut inuuniarnermikkut artorsaateqartarput ingerlaqqillutik inuuniassagunik immikkut ikiorserneqartariaqarput tapersersorneqarlutillu. Kinguaariinni kingornuttakkat nuanninngitsut allannguiffigisariaqalerpavut.

Qaasuitsup Kommuniani inuit sullinneqarnerini tamakkiisumik eqqarsartaaseqarluta iliuuseqarnissaq immikkut sammivarput inuillu ataasiakkaat kisiisa pinnagit sullissisarluta. Suliniutigut kimeqarluassappata ajornartorsiut inuillu ataasiakkaat kisiisa piunnaarlugit inuk ajornartorsiulernerlu sumit pinngorsimanersoq aamma takusariaqartarparput.

Siusissukkut iliuuseqarneq pingaarnerpaavoq. Ajornartorsiutit oqimaappallaalinnginneranni sukkanerpaamik iliuuseqarfigisariaqarpavut.

Naartusut siusissukkut iliuuseqarfiginerisigut suliffeqarfiillu; kommune, ernisussiortut meeraaqqerisullu, akimorlugit suliniuteqarnikkut Qaasuitsup Kommuniani innuttaasunngortut pitsaasumik inuuneqarnissaannik aqqutissiuutissavagut.

Inuit nukingi aningaasallu annaaneqartarput inuusuttorpassuit susassaqartinneqaratik illoqarfimmi unnuakkut aneertaleraangata. Ajornartorsiut taanna takusariaqalerparput asannittumik, aalajangersimasumilli, inuusuttut isumaqarnerusumik imalinnut ataatsimoorfiusartunut qaaqqullugit. Taamaaliornikkut namminneq imminnut akisussaaffiginertik allanillu akissussaaffeqarnertik ilinniarsinnaalissammassuk.

Meeqqat inuusuttullu taakkununnga attuumassuteqarsinnaasunik suliniarnitsinni siunissami peqataatissavagut. Taamaalilluta meeqqat inuusuttullu akornanni suleqataarusussuseq akisussaffeqarnerulernerlu taakkununnga tunniussinnaassavarput.

Utoqqasaat utoqqaallu inuiaqatigiinni pingaaruteqartorujussuupput. Kiserliortinneqassanngillat toqqorneqarlutillu paarlattuanilli naleqarluartumik ilisimasaqarnertik misilittagaqarnertillu peqqutigalugit ataatsimoortuunermi peqataatinneqassapput. Utoqqasaat naleqartutut misigisimatinneqassapput. Utoqqasaat angerlarsimaffimminni najugaqarnissaminnik kissaateqarnerat sapinngisamik anguniarlugu suliniuteqartoqassaaq. Utoqqaat illui inerisarneqassapput pitsaassuseqarluartumik.