Imminut napatissinnaasumik silaannaallu allanngoriartornera avatangiisitsinnut pinngortitamullu pingaarutai kommunemit immikkut sammineqarnerulerput. Nunarsuup allanngoriartornerani silap allannguutaanut pilersaarusiornissaq atorfissaqartinneqarpoq, erngup kuugunneqartup aamma immap qaffakkiartorneranit pilersinneqartunut. Aamma illugisatta akornanni aamma illoqarfiit avataanni nunami nunaminertat atorneqartarnerat isiginiarneqartariaqarpoq.
Sila malunnartuinnartumik ukiuni makkunani allanngorarpoq. Silap allanngorarnerata kingunerisaanik siallernerusalerpoq/nittaannerusalerpoq, anorlerajunnerulerluni, ississiut atorlugu nillissutsimik agguaqatigiisillugu uuttortaanerit naapertorlugit kiannerulerpoq aamma sivikinnerusumik ukiuusalerluni.
Silap allanngorarnera qanorpiaq kinguneqassanersoq qularnaatsumik massakkorpiaq oqassalluni nalorninartorujussuuvoq: kommunemut siunissaq qaninnerusoq ungasinnerusorlu eqqarsaatigalugit iluaqutissat ajoqutissallu suunersut ilisimaneqanngimmata.
Siulitta silap allanngorarnera aamma misigisarpaat naleqqussarfigisarlugulu. Qaasuitsup Kommuniata allanngorarnernut tulluussarnissaa pingaartuuvoq.
Qaasuitsup Kommunia ilisimasaqarluarusuppoq aamma silap allanngornerarnerata kingunerisinnaasaanut periarfissat nutaat unammillernartussallu naleqqussarfiginissaannut piareersimarusulluni. Inuit gassinik aniatitsinerulerneri silap allanngorarneranut peqqutaaqataalluinnarput. Taamaattumik CO2-mik aniatitsineq killilersimaartariaqarparput. Tassunga atatillugu Qaasuitsup Kommunia oqartussatut siuttoorusuppoq.
Nutaamik sanaartukkat avatangiisinut ajoqutaannginnissaat piumasaraarput. Sapinngisamik nukissianik pilersuinitsinni avatangiisinut ajoqutaanngitsunik atuissaavugut. Kommunep allaffia avatangiisinut ajoqutaanngitsunik nukissiuutinik pilersorneqarsinnaasunngortinneqassaaq taassumalu kingorna kommunep illuutai sapinngisamik amerlanerpaat aamma taamaaliorneqassallutik.
Innuttaasut asiartarnerinut, aalisartarnerinut, piniartarnerinut, najugaqariaasiinut aamma takornariartitsisarnerinut pinngortitaq pingaarluinnartuuvoq. Qaasuitsup Kommuniani inuiaqatigiit inerisarneqarnissaannik piumasaqarnitsinni inuit inuuniarmikkut atugaasa uumasut naasullu piujuarnissaat ataqqilluinnarlugu pissaaq.
Kommunep pinngortitamik suliaqarnerani makku suliarineqartartussapput; pinngortitamik allanngutsaaliuineq, pinngoqqaarnermiit allannguisoqarsimatillugu aaqqissuineq, pinngortitamik nakkutilliineq, nunaminertanik eqqissisimatitaasunik nakkutilliineq, qangarnitsanik allattuineq, pinngortitamik illersuineq, kikkut tamat pinngortitaliarsinnaanerinik pinngortitamiissinnaanerinillu pitsanngorsaaneq ilisimatitsisarnerlu.
Motorit orsersorneqarnerisa kingorna uuliakunik imaanut eqqaasarneq, asiarfiusimasuni eqqagassat pinngortitamut eqqarneqartarneri, puukullu qimussit aqqutaannut eqqarneqarsimasut naammattuukkajuttarparput.
Periutsimik allannguisoqartariaqarpoq. Eqqakkanik pinngortitamut eqqaasarnerput unitsissallugu sungiuttariaqarparput pitsaanerusunillu ileqqoqalerluta.
Avatangiisit pillugit iliuusissatut pilersaarut ukiuni tullerni suliarineqartussaavoq, taassuma pinngortitap ajorseriannginnissaa inuuniarnermilu atukkat ajorseriannginnissaat, massakkut ukiunilu aggersuni, qulakkeertussaavaa.
Eqqakkat immikkut sammineqassapput. Sutigut tamatigut eqqakkat pillugit eqqartuisoqartariaqarpoq; eqqakkanik suliaqartariaaseq, akuutissat atortullu suut inginneqartarnersut qanorlu suliarineqarsinnaanersut paasiniaasoqartariaqarpoq nukiit sumiginnartineqartartut killilersimaarniarlugit – nukissiornermut iluaqutissanngortitsisoqarsinnaanersoq atoqqiisoqarsinnaanersorlu anguniarlugu.
Aatsitassanik pinngortitamilu pigisanik allanik atorluaaneq sutigut tamatigut illersuisoqarsinnaasunngorlugu imminullu akilersinnaasunngorlugu anguniagaqartoqassaaq. Eqqakkanut tunngasut tamarmik misissorneqarnissaat ilisimalerneqarnissaallu qulakkiissavarput.
Qaasuitsup Kommuniani akilersinnaanerusumik inerisaanissaq anguniarsinnaaqqullugu innuttaasut, suliffeqarfiit kattuffiillu suliniarnermi peqataatinneqartariaqarput. Tassanilu kommune najukkami oqartussatut siuttuunissaa malitassiuussisuunissallu pingaartutut isigaarput.
