Nunarsuarmi kommunenet annersaatut kommune immikkut illuinnartunik unammilligassarpassuaqarpoq. Ammasuuneq, teknikkikkut nutaalianik atuineq aamma oqaloqatigiinneq atorlugit kommune uummaarissuunissaminik qulakkeerinnittuussaaq, taamaaliornikkummi innuttaasut kikkut tamat oqartussaaqataanerannut ilaasutut misigisimatinneqartussaassapput.
Kommunerujussuatsinni najugaqarfiit imminnut ungasissorujussuunerisa kingunerisaanik innuttaasut tamarmik peqataatinniarneri unammillernartorujussuusarpoq.
Innuttaasut kommunep inerisarneqarnerani naalakkersuinikkullu aalajangeeriaatsit qanimut malinnaaffigisinnaanerinik misigisimanissaat qanoq iliorluta taama ungasitsigisumi innuttaasut najugaqaraluartut qulakkeerniarsarissavarput? Kommunep suliarisartagai pillugit kikkut tamat oqartussaaqaaffigineqarlutik pitsaasumik sammisanik aalajangersimasunik oqallittoqarfiusoq oqaloqatigiiffiusorlu qanoq qulakkeerniassavarput aamma Qaasuitsup Kommuniata imminut ataqatigiittuuneranik nukittorsaaqataasussaq qanoq qulakkeerniassavarput?
Kommunemi unammillernarsinnaasut ajornartorsiutaasinnaasullu innuttaasunut amerlanerusunut paasissutissiissutigisarnissaat Qaasuitsup Kommuniata kissaatigaa. Taamaalilluni Qaasuitsup Kommunia nutaamik periuseqarluni kommunemi innuttaasut peqataatinneqarnissaannik suliaqartarluni ammasumik piumassuseqartumillu takutissavaa. Innuttaasut tunngaviusumik piginnaatitaaffii pillugit pitsaanerusumik paasissutissinneqarneriniit innuttaasut peqataatinneqarnissaannut periutsinik nutaanik misileraanerit suliarineqassapput.
Pilersaarutit anginerusut aamma aalajangigassat pillugit innuttaasunik sapiiserluni peqataasitsinikkut aperisarnikkullu najukkani ataasiakkaani ilisimasat nalunngisallu siammartinneqartarput taakkulu peqataanerunissamik akisussaaffimmillu kinguneqartarlutik.
Innuttaasut kinguaavi oqaloqatigiinnermik oqallinnermillu sungiusarneqassapput taamaalilluni meeqqat inuusuttullu kikkut tamat oqartussaaqataaneranni nalinginnaasumik oqallinnerni peqataalluartalerniassammata.
Teknologimik nutaaliaasumik atuineq periutsinik atorniakkatsinnut ilaavoq; taassumami atorneratigut innuttaasut kommunelu imminnut qanilaartutut isigineqalersisinnaavagut. Kommunep nittartagaa nutaarluinnaq siunissami ataatsimoorfigissallugu pingaarteqarluinnarpoq. Taanna aqqutigalugu kommunemi najugaqarfiit avannarlerpaartaaniit kujallerpaartaanut innuttaasut najugaqaraluarunik qanimut sullinneqarlutik misigilersitsissaaq.
Kommunemi innuttaasut tamarmik internetimik atortuanillu bredbånd-imik peqarnissaat pingaartinneqartorujussuuvoq. Kommunerujussuatsinni assigiinngissutsit kulturikkullu assigiinngiiaarnerup inissaqartinnissaat kissaatigaarput.
Kommunemi unammilligassarujussuit ilaat tassaavoq aaqqissusseriaaseq sungiusimasarput allanngorlugu immikkut piumasaqalernissarput.
Innuttaasut peqataatinneqarnerini, innuttaasunik attaveqartarnermi kiisalu kommunip allaffissornermik suliaqarnerani qarasaasiat atorneqarnerisa inerisarneqarnerisa saniatigut illoqarfinni nunaqarfinnilu illuutit aamma inerisarnissaat eqqarsaatersuutigineqassapput.
Ingerlatsiviit, immikkoortortat, suliaqarfiit nunallu isorartunera akimorlugit suliffeqarfiup ataasiussusiank pilersaarutillu naapertorlugit sullissisarneranik tunuliaqutaqarluta sulinerput samminersusariaqarparput. Ataatsimoorluta inerisaasinnaavugut pilersaarutinillu nutaanik toqqartuisinnaalluta, taakkumi allanngueqataasinnaapput uagullu aaqqissuusseriaaserput apeqqutaalluinnartarpoq suliaq iluatsissanersoq imaluunniit iluatsinngitsuussanersoq.
Kommunemi suliniutit suliarsartakkallu assigiinngitsut eqikkarneqartarnissaat nalilersortarnissaallu siunissami pikkoriffiginerusariaqarparput. Pilersaarut nutaaq tamatigut aallartikkaangatsigu naammassereernerani nukissaqalaarluta qanoq kinguneqarsimanersoq ilisimasanik katersilaarsinnaasariaqarpugut. Tamatuma kingunerisaanik pilersaarusiornermi inuit peqataasimasut assigiinngitsut aperisassavagut; qanoq issoraajuk? Suut pitsanngorsarneqarsinnaappat?
Taamaaliornikkut kommune pilersaarusiornermini ilisimasaqaleriartorsinnaavoq kukkussutigisimasallu uteqqiaffiginissaat pinngitsoorsinnaallugu.
Qaasuitsup Kommuniata kissaatigaa kommunetut tikikkuminartuunissi, isikkuminarluni sulerusussuseqarlunilu – nunatta iluanit nunanilu tamalaanit tamatuminnga ilisimaneqaatiminik. Nutaamik suleqatigiittarnikkut, attaveqaateqarnikkut, ilisimasanik avitseqatigiittarnikkut teknologimillu nutaaliaasumik atuinitsigut nunarsuarmi pisunik paasisaqaleriartorsinnaavugut nutaanillu ikinngutitaarnissatsinnut tunngavissiuisinnaalluta aamma siunissami inerikkiartuutigisinnaasatsinnik pilersitsisinnaalluta.
