Kommunip ineriartortinneqarnera

Kommunip pilersaarusiorneranut inuiaqatigiit agguataarneqarnerat naapertuutissaaq. Taamaalilluta inuiaqatigiit amerlassusaat, matumani arnat angutillu agguataarnerit, ukiui kiisalu periusai allanngoriartornerilu malinnaaffigineqassapput. Taamaattumik kommunip kisitsisaatai pingaarnerit inuiaqatigiillu agguataarnerat ullumikkut atuuttoq saqqummiunneqarput.

Inuiaqatigiit amerlassutsimikkut ikileriartut

Avannaata Kommuniani innuttaasut amerlassusaat 2012-imiilli 200-t missaannik ikilisimapput, procentinngorlugu 2 %-ingajammik. Avannaata Kommuniata pigisaani tamani innuttaasut 2012-imiilli ikiliartorput. Upernavimmi ikileriarnerpaasimapput (-1999).

Innuttaasut nunaqarfinniit illoqarfinnut noorar- tut takuneqarsinnaavoq. Ullumikkut kommunip innuttai illoqarfinni najugaqartut 73 %-iupput nunaqarfinnilu najugaqartut 27 %-iullutik. Illoqarfiit sisamat pigisaanni nunaqarfittaanni innuttaasut amerlassusaat 2012-imiilli ikiliartorsimapput, akerlianilli Ilulissani Uummannamilu innuttaasut amerliartorsimallutik, Ilulissani 49-nik Uummannamilu 127-nik amerliartoqarsimavoq. Uummannami amerlipiloortoqarnera 2017-imi Illorsuit Nuugaatsiallu eqqaani tassaarsuaqarneratigut annerusumik peqquteqartoq naatsorsuutigisariaqarpoq. Upernavimmi innuttaasut 42-t allamut nuupput, Qaanaamilu innuttaasut amerlassusaat allanngorneqarani.

Utoqqaat angutillu amerlanerusut

2012-imiilli meeqqat inuusuttullu ikileriarput. 2020-mi januaarip ulluisa aallaqqaataat aallarnerfigalugu ukioqanngitsuniit 16-it tikillugit ukiulinni Qaanaami amerlanerpaajusimapput (28 %) Uummannamilu ikinnerpaasimallutik (22%). Akerlianik 25-t 64-illu akornanni ukiullit 65-ileereersimasullu amerleriarsimapput. Kommunimi innuttaasut akornanni arnat 47 %-iupput angutillu 53 %-iullutik. Iloqqarfinni pigisaannilu sisamaasuni arnat angutillu agguataarneri assigiikannerput. Qaanaami arnat amerlanerpaapput (50 %) Qaanaallu nunaqarfittaani angutit amerlanerpaallutik (61%)

Inoqutigiit meerartaqanngitsut amerlanerusut 2012-imiilli inoqutigiinni aappariit meerartallit ikilingaatsiarsimapput, allallu inoqatigiit amerlingaatsiarsimallutik. Inoqutigiit meerartaqanngitsut, kisimiittut, aappariit aamma inoqutigiit allanik inersimasunik najugaqateqartut pineqarput. Inoqutigiit meerartaqanngitsut amerlanerpaat Uummannamiipput, pingasuugaangata marluk meerartaqassanatik. Upernavimmi inoqutigiit meerartallit amerlanerpaapput (45%).

Ilulissat aamma Qaanaaq kisimiittunik innuttallit amerlanerpaapput (38-39%), Upernavimmilu ikinnerpaallutik (25%).

Inoqutigiit amerlassusaat 2000-imiit 3,12-imiit 2020-mi 2,75-inut ikilisimapput. Inoqarfiit tamarmik inoqutigiikkuutaarlugit amerlassutsimikkut ikileriarsimapput.

Inuiaassutsit

2020-mi kommunimi innuttaasut Kalaallit Nunaata avataani inunngorsimasut 600-t missaanniipput. Inuiaqatigiit 5,6 %-iisa missaanniittuupput. Innuttaasut Kalaallit Nunaata avataani inunngorsimasut 2003-p 2017-illu akornanni ikiliartorsimapput, kingornali amerliartupiloorsimallutik, taamaalillutik 2020-mi amerlassusaat 2007-misulli ipput. Innuttaasut Kalaallit Nunaanni inunngorsimanngitsut amerlanerpaat Ilulissani najugaqarput (9,1%) Upernavimmilu (1,9%) kiisalu Qaanaami (2,1%) ikinnerpaallutik.

Inoqarfinni kommunimiluunniit naalagaaffimmi innuttaanerit kisitsisinngorlugit pigineqanngillat. Kalaallit Nunaat tamaat isigalugu filippinerisut aamma thailandimiutut innuttaassusillit amerlasoorpassuanngornikuupput, taakkulu 2007-miit amerliartupiloorsimallutik.

Innuttaasut amerlassusaannik kisitsisinngortitsineq

Kalaallit Nunaanni Naatsorsueqqissaartarfimmi kisitsisit nutaanerpaat (juuni 2020-mi saqqummiunneqartut) naapertorlugit, nuna tamakkerlugu innuttaasut 1.300-t missaannik ikileriassasut naatsorsuutigineqarpoq. Avannaata Kommuniani allanngujaatsuunissaat amerlanngitsunilluunniit amerlinissaat naatsorsuutigineqarpoq. 2030-mi 65-ileereersimasut amerlerujussuarsimanissaat sinnerilu, pingaartumik 17-iniit 24-nut ukiullit ikilisimanissaat naatsorsuutigineqarpoq.